monumenta.ch > Boethius > 30
Boethius, De Arithmetica, 2, XXIX. De generatione laterculorum, eorumque diffinitione. <<< >>> XXXI. De natura rerum quae dicitur eiusdem naturae, et de ea quae dicitur alterius naturae, et qui numeri cui naturae coniuncti sunt.
Boethius, De Arithmetica, 2, CAPUT XXX. De circularibus vel sphaericis numeris
1 Ipsorum vero cuborum quanticunque fuerint ita ducti, ut a quo numero cubicae quantitatis latus coeperit, in eumdem altitudinis extremitas terminetur, numerus ille cyclicus vel sphaericus appellatur, ut sunt multiplicationes quae a quinario vel senario proficiscuntur. Nam quinquies quinque, qui fit 25, ab 5 progressus, in eosdem 5 desinit.2 Et si hos rursum quinquies ducas, in eosdem 5 eorum terminus veniet. Quinquies enim 25 fiunt 125, et si hos rursus quinquies ducas, in quinarium numerum extremitas terminabitur. Atque hoc usque in infinitum idem semper evenit. Quod in senario quoque convenit considerari. Hi autem numeri idcirco cyclici vel sphaerici vocantur, quod sicut sphaera vel circulus, in proprii semper principii reversione formantur.3 Est enim circulus posito quodam puncto et alio eminus defixo, illius puncti qui eminus fixus est aequaliter distans a primo puncto circumductio, et ad eumdem locum reversio unde moveri coeperat. Sphaera vero est semicirculi, manente diametro, circumductio et ad eumdem locum reversio unde prius coeperat ferri. Unitas quoque, virtute et potestate, ipsa quoque circulus vel sphaera est, quoties enim punctum in se multiplicaveris, in seipsum unde coeperat terminatur.4 Si enim faciat semel unum, unus redit, et si hoc rursus semel, idem est. Igitur si una fuerit multiplicatio, solam planitudinem reddit, et fit circulus. Si secunda, mox sphaera conficitur. Et enim secunda multiplicatio, effectrix semper est profunditatis. Ex 5 igitur et 6, paucas huiusmodi formas subscripsimus:
Boethius HOME
bnf1614.58 bnf6639.129 bnf11241.56 bnf11242.65 bsb46504.194 cec83.99 cec185.125 cec186.93 csg248.35 sbe358.106 vad296.32v
© 2006 - 2024 Monumenta Informatik